Hvernig er best að útbúa atvinnuumsókn?

Engar reglur eru til um það hvernig sækja á um starf eða hvernig atvinnuumsókn á að líta út. Umsóknin getur þó verið mikilvægasta skrefið í atvinnuleitinni ef það eru fyrstu kynni atvinnurekandans af þér.

Gott er að miða við að atvinnuumsókn sé umsóknarbréf á einni síðu, ferilskrá á annari og fylgiskjölin síðan í réttri röð.

Skýringar: Atvinnuumsókn er persónulegt bréf til vinnuveitanda þar sem sótt er um starf og ferilsskrá er yfirlit yfir náms- og starfsferil umsækjanda. Ferilsskrá er stundum nefnd CV sem stendur fyrir Curriculum Vitae sem er latína og þýðir u.þ.b. lífshlaup og einnig er franska orðið Résumé notað.

Atvinnuumsókn má skipta í þrjá þætti:

1. Umsóknarbréf. Í umsóknarbréfi kemur fram hver sækir um hvaða starf, hvers vegna sótt er um starfið og hvað það er sem gerir umsækjanda hæfan til að gegna því.
2. Ferilskrá. Þar eru tíundaðar persónulegar upplýsingar, menntun, starfsreynsla, áhugamál og meðmælendur. Sjá nánar um gerð ferilskrár.
3. Fylgiskjöl t.d. prófskírteini og meðmælabréf.